طبعا كلنا بنشوف برامج المسابقات سواء فى رمضان او غير رمضان
من اول البرامج اللى بتستضيف فنان
وطبعا هو مش بيجى حبا فى الجهمور
لان كل فنان ليه سعرة ومبلغ بيخده
لحد البرامج اللى بتختار ناس من شعبنا الغلبان
يكسب فى مسابقة ما
وهتكلم عن دقوا المزاهر
لانه أهمهم ومقدمه من اهم الاعلاميين
عجبنى فكرة برنامج الاعلامى محمود سعد
اللى بحب برامجه واسلوبة فى تقديمها
وفرحت لانها هتساعد شباب وشابات
فى الارتباط والجواز بعد طول انتظار وصبر
وصدمت فى البرنامج نفسه
صدمت جداا لاسباب كثيرة
البرنامج المفروض حاسس بأزمة السكن
اللى بقالها عشرات السنين فى مصر
وبيحاول يساعد بعض الشباب فى تملك شقة
أتكلم عن جزئ جزئ فيه واقولكم انا معترض على ايه
طبعا
رقم واحد أختيار المتسابقين
الاعلامى محمود سعد قال أنهم أختاروا
المتسابقين بمعيار صارم ومواصفات معينة
بس انا شوفت المتسابقين اللى كانوا فى البرنامج
لقيت نفس المعيار اللى اختاروا عليه المتسابقين
ممكن يختار الالوف من شباب مصر وشباته
ونفسى أعرف هما اختاروا الستين دول على أى أساس
يعنى عملوا قرعة بين الالوف اللى تنطبق عليهم المواصفات
ولا أيه بالضبط
انا مش بشكك فى ذمة المسئوليين على البرنامج
بس لازم نعرف الاختيار كان على اساس ايه
يعنى معد بيروح كافيه فلقا شاب
غلبان شغال فى الكافيه فأختاروا
ولا معد جاب بتاع محاروة ولا نقاش
وحس بأحتياجه للشقه واختارة
ولا معد شاف البواب عنده قريب غلبان
فأختار الستين منهم
واكرر ان المتسابقين كلهم محتاجين
مساعدة ويستهلوا شقة بس فى ملايين زيهم برضوا
انا شايف
ان الاختيار كان لازم يكون بقرعة
وعلنية كمان قبل رمضان بمدة طويلة
رقم أتنين سن المتسابقين
طبعا لما شوفت البرنامج فى أولى حلقاته
فكرت ان من شروطة سن العريس والعروسة
ودى من الشروط الصارمة اللى أختاروا بيها المتسابقين
لاكن الغريب انى ملقتش الشرط ده ولقيت عريس
سنه ولقيت أكتر من عريس سنه أقل من28سنة
وكثير من العرائس سنهم أقل من 25سنة
وانتم طبعا عارفين ان دلوقتى مشكلة السكن
بتاخر سن الزواج للرجل لفوق ال35 وللبنت لفوق30
وفى احصائية بتقول ان عدد البنات اللى عدوا 35سنة
ولم يتزوجوا فوق ال3 ملايين
وعدد الشباب فوق ال6 ملايين
اظن من بين ال9 ملايين دول
فيه ألوف تنطبق عليهم شروط البرنامج الصارمة
واظن شاب فوق ال35 وينت فوق 30اولى
بأختيارها من شاب عنده26سنة وبنت عندها 22سنة
لسه ادامهم وقت ومفيش خوف
علي الشاب يتعقد ولا شابة تحس بالعنس
أنا شايف برضوا
كان مفروض من ضمن الأختيار تحديد سن عالى
شوية للمتسابقين على الاقل 30 للشاب و25 للشابة
وبقول عل الاقل
رقم ثالثة الخمسين الف
يعنى اختارتوا الستين متسابق
من غير قرعة ولا مسابقة وعلى مزاجهم
وفوتناها
وعدينا سن المتسابقين وقولنا كلهم غلابة
وهما تعبوا وذكروا وربنا أكرمهم وفازوا
لاكن اللى خسروا يخدوا خمسين الف ليه
ده اى منطق واى عقل يقبله
الفرصة اللى كانت للخسرانين
كان يتمناها ملايين الشباب ولم يحالفهم الحظ
ندى بقه فرصة الخمسين الف لستين
تانين يجتهدوا ويفوز منهم تلاتين
لاكن أول مرة فى التاريخ أسمع
وأشوف ان أنسان يخش مسابقة
وأختياره مجاش بكفاءة ولا مجهود منه
جاء بناء على أختيار المسئولين على البرنامج
ويخسر الفرصة دى
ورغم ضياع فرصته يأخد مبلغ لخسارته
أنا شايف العدل
أن الفرصة دى كان يستحقها ملايين كتير من الشباب
اللى مجتلهمش فرصة الاشتراك فى مسابقة
بشقه
يخدوا هما فرصة مسابقة بخمسين الف
رقم اربعة مكافأة الغش
طبعا المسئوليين مش حاسين بشباب مصر الغلبان
اللى دايخ سنين على حيتة شقة
وهو بيشوف الكسبان بياخد شقة
بس بيقول ربنا كتبهاله وهو اجتهد برضوا
والخسران بياخد مبلغ لخسارته
حظوظ بقه
بيشوف كمان اللى حاول يغش فى المسابقة
بيكافئ برضوا
وبياخد برضوا مبلغ الخمسين الف
طبعا انا شايف
ان الشاب ده مظلوم لان الغلب خلاه يفكر كده
وكتير مننا كان هيفكر زيه فى الف طريقة
ممكن تخليه يكسب بغش او من غير غش
وكمان مصر مليانة غشاشين جت عليه
أه طبعا جت عليه
لان كل الناس شافته
وللدرجة دى الغش بقه عادى
ومفيش اى حساب عليه
أخر حاجة
طبعا انا مش بحقد على الستين شاب دول
بس انا بجيب مثل لمسابقات الاعلام
اللى مش عارفيين مين بيضمن عدلها وحيادتها
ومعلومة ان البرنامج كلف حوالى2مليون جنيه
يعنى تقريبا قريب من اللى اخدوه ال30شاب
وادينا وادى شبابنا حظهم اللى خلاهم يكونوا
كسبانين رغم خسارتهم
لمجرد ان حد اختارهم مهما كان سبب اختياره
والسلام عليكم
